जीवन दाहाल भोजपुर  पृथ्वी राजमार्गअन्तर्गत धादिङको कृष्णभीर क्षेत्रमा निरन्तरको पहिरोका कारण अवरुद्ध बनेको सडक खुलाउन नयाँ ट्रयाक निर्माणको काम अन्तिम चरणमा पुगेको छ। आगामी असोज १ गतेदेखि उक्त खण्डमा दुवैतर्फबाट सहज रूपमा यातायात सञ्चालनमा ल्याउने गरी तीव्र गतिमा काम भइरहेको छ।

सडक विभाग तथा प्राविधिक टोलीका अनुसार पहिरोग्रस्त क्षेत्रमा वैकल्पिक ट्रयाक निर्माण गरी सडक फराकिलो बनाउने र जोखिमपूर्ण ढुङ्गाहरू हटाउने कार्य अन्तिम चरणमा पुगेको हो। रातदिन खटिएर मेसिन तथा जनशक्ति परिचालन गरिएकाले तोकिएकै मितिमा दुईतर्फी गाडी चलाउन सकिने आयोजनाले जनाएको छ।

चाडपर्व नजिकिँदै गर्दा राजधानी काठमाडौँलाई देशका अन्य भागसँग जोड्ने मुख्य जीवनरेखा मानिने पृथ्वी राजमार्गमा दुईतर्फी यातायात सञ्चालनमा आएपछि यात्रु तथा सवारी चालकहरूलाई ठूलो राहत मिल्ने विश्वास लिइएको छ। असोज १ गतेसम्मका लागि भने एकतर्फी तथा नियन्त्रित रूपमा मात्र यातायात सञ्चालन भइरहेको छ।