दिपेन्द्र लुईटेल
भोजपुर । नेपाली कांग्रेसको १५औँ महाधिवेशन अन्तर्गत भोजपुरमा वडा अधिवेशनको तयारी पूरा भएको छ। जिल्लाका ८१ वटै वडामा आगामी असोज ३ र ४ गते वडा अधिवेशन हुने भएको हो।

नेपाली कांग्रेस भोजपुर जिल्लाका सभापति बिनोद बान्तवाका अनुसार जिल्लाभरका वडा अधिवेशनमा करिब ५ हजार ९ सय क्रियाशील सदस्य सहभागी हुनेछन् । केन्द्रीय कार्यतालिकाअनुसार महाधिवेशनअन्तर्गतका कार्यक्रम अघि बढाइएको उनले जानकारी दिए।
वडा अधिवेशनको तयारीबारे नेपाली कांग्रेस भोजपुरले शुक्रबार पत्रकार सम्मेलनमार्फत जानकारी दिएको हो। पार्टीका अनुसार सम्बन्धित वडाको अनुकूलताअनुसार असोज ३ वा ४ गते अधिवेशन सम्पन्न गरिनेछ।
नेपाली कांग्रेस भोजपुरका सभापति विनोद बान्तावाले वडा अधिवेशनमा सम्पूर्ण क्रियाशील सदस्यलाई उत्साहपूर्वक सहभागी हुन आग्रह गरेका छन्।

उनले अधिवेशनमा भूगोल, जातीय समुदाय तथा फरक क्षमता भएका व्यक्तिको समावेशी र समानुपातिक सहभागितालाई प्राथमिकता दिइने बताए।
कांग्रेस भोजपुरका अनुसार असोज ७ गते पालिका अधिवेशन र असोज १० गते प्रदेशसभा क्षेत्रीय अधिवेशन गर्ने कार्यतालिका तय भएको छ।
यसरी, वडा अधिवेशनसँगै नेपाली कांग्रेस भोजपुरमा १५औँ महाधिवेशनका लागि संगठनात्मक गतिविधि तीव्र हुने भएको छ।