भोजपुर । भोजपुरको अरुण गाउँपालिका–३ ओमडाँडास्थित प्याउली जाने भित्री सडकको छेउमा एक पुरुष मृत अवस्थामा फेला परेका छन्।

मृत फेला पर्नेमा अरुण गाउँपालिका–३ विजयबास निवासी अन्दाजी ५० वर्षीय राजकुमार तामाङ रहेका छन्। उनी शनिबार बिहान करिब ८ बजे सडकको छेउमा चिलाउनेका स्याउला र हाँगाले शरीरको केही भाग ढाकिएको अवस्थामा फेला परेका हुन्।

उक्त स्थानमा एक व्यक्ति मृत अवस्थामा रहेको जानकारी बिहान ८ः३० बजे टेलिफोनमार्फत प्राप्त भएपछि प्रहरी घटनास्थलमा पुगेको थियो। प्रहरीका अनुसार अस्थायी प्रहरी पोस्ट मर्‍याङडाँडा र प्रहरी चौकी प्याउलीबाट खटिएको टोलीले घटनास्थल सुरक्षित राखेको थियो।

घटनाबारे थप अनुसन्धान तथा कानुनी प्रक्रिया अघि बढाउन जिल्ला प्रहरी कार्यालय भोजपुरबाट प्रहरी नायब उपरीक्षक ज्ञानबहादुर खड्काको कमाण्डमा सोको (SOCO) सहित सात जनाको टोली घटनास्थल पुगेको थियो।

आवश्यक कानुनी प्रक्रिया पूरा गरी मृतकको शव पोस्टमार्टमका लागि जिल्ला अस्पताल भोजपुर पठाइएको प्रहरीले जनाएको छ। मृतकको मृत्युको कारण भने खुल्न सकेको छैन। घटनाबारे थप अनुसन्धान भइरहेको प्रहरीले जनाएको छ।