भोजपुर । भारी वर्षाका कारण सम्भावित विपद्जन्य घटना रोकथाम तथा जोखिम न्यूनीकरणका लागि जिल्ला प्रशासन कार्यालय भोजपुरले जिल्लाका विभिन्न सडकमा सवारी आवागमन रोक्ने निर्णय गरेको छ।
जिल्ला प्रशासन कार्यालय भोजपुरले जारी गरेको अत्यन्त जरुरी सूचनाअनुसार आज  साँझ ६ बजेदेखि जिल्लाका विभिन्न सहायक राजमार्गमा सवारी आवागमन बन्द गरिने भएको हो।
मौसम विज्ञान विभागको मौसम पूर्वानुमान महाशाखाबाट जारी विशेष मौसम बुलेटिनअनुसार २१२ गतेसम्म देशभरका विभिन्न स्थानमा भारी वर्षा हुने पूर्वानुमान रहेको जनाइएको छ। भोजपुरमा समेत निरन्तर भारी वर्षा भइरहेकाले बाढी, पहिरोलगायत विपद्जन्य घटना हुन सक्ने जोखिमलाई मध्यनजर गर्दै जिल्ला सुरक्षा समितिको निर्णयअनुसार सवारी आवागमनमा रोक लगाइएको प्रशासनले जनाएको छ।
निर्णयअनुसार भोजपुर सदरमुकामबाट उत्तरतर्फ षडानन्द नगरपालिकाको केन्द्र दिङ्ला हुँदै जाने तथा सदरमुकामबाट दक्षिणतर्फ बैकुण्ठे हुँदै हतुवागढी गाउँपालिका र आमचोक गाउँपालिका बालंखा जाने सहायक राजमार्गमा साँझ ६ बजेदेखि सवारी आवागमन बन्द गरिनेछ।
त्यस्तै, भोजपुर जिल्लाअन्तर्गत पर्ने मध्यपहाडी लोकमार्गमा समेत साँझ ७ बजेदेखि बिहान ४ बजेसम्म सवारी आवागमन रोक लगाउने निर्णय गरिएको छ।
तर बिरामी बोकेका एम्बुलेन्स, दमकल तथा अत्यावश्यक खाद्यान्न बोकेका सवारी साधनको हकमा भने नजिकको प्रहरी कार्यालयसँग समन्वय गरी सञ्चालन गर्न सकिने जिल्ला प्रशासन कार्यालयले जनाएको छ।
भारी वर्षाका कारण सडकमा बाढी तथा पहिरोको जोखिम बढेकाले यात्रु तथा सवारी चालकलाई आवश्यक सतर्कता अपनाउन प्रशासनले आग्रह गरेको छ। साथै सम्भावित विपद्जन्य घटनाको न्यूनीकरण तथा उद्धार कार्यलाई प्रभावकारी बनाउन सम्बन्धित निकायलाई आवश्यक तयारी अवस्थामा रहनसमेत निर्देशन दिइएको छ।